Pajisja me Faturë Tatimore për Produktet Ushqimore: Angazhim për Transparencë dhe Siguri Ushqimore

Në kuadër të transparencës dhe informimit të publikut, bëjmë me dije se Ministria e Bujqësisë dhe Zhvillimit Rural, në bashkëpunim të ngushtë me Ministrinë e Financave dhe Administratën Tatimore, prej 14 Korrikut 2025, në zbatim të Urdhërit të Ministrit nr 678, kanë hyrë në fuqi detyrime të reja për pajisjen me faturë tatimore për të gjitha produktet ushqimore(bujqësore dhe blektorale) që dalin në treg.

Ky hap është pjesë e strategjisë kombëtare për formalizimin e ekonomisë agroushqimore, rritjen e gjurmueshmërisë së produkteve bujqësore, si dhe garantimin e të drejtave të konsumatorit për produkte të kontrolluara dhe të sigurta.

Çfarë përfshin kjo nismë:

•      Çdo operator i biznesit ushqimor, përfshirë fermerët që tregtojnë prodhimin e tyre, do të jetë i detyrueshëm të lëshojë faturë tatimore për çdo shitje.
•      Faturimi elektronik (E-fatura) do të jetë forma standarde e raportimit dhe do të ndihmojë në uljen e informalitetit dhe garantojë gjurmueshmërinë e tyre.
•      Subjektet që tregtojnë produkte ushqimore pa faturë do të jenë objekt i kontrollit dhe ndëshkimeve sipas ligjit nr. 9920, datë 19.5.2008 “Për procedurat tatimore”.

Përfitimet e qytetarëve dhe fermerëve:

•      Siguri mbi origjinën dhe përbërjen e produkteve ushqimore.
•      Mbështetje fiskale për fermerët që formalizohen (përfshirë akses në subvencione, kredi dhe programe zhvillimi).
•      Rritje e konkurrueshmërisë së produkteve shqiptare në tregun e brendshëm dhe atë të eksportit.