Mbështetje në bujqësi

Rreth 90 % e aplikuesve, fitues paraprakë në Skemat Kombëtare të Mbështetjes në bujqësi

Shpallen fituesit e Skemës Kombëtare të Mbështetjes Financiare. Mbi 90 % e aplikuesve të Skemës Kombëtare të Mbështetjes Financiare janë shpallur fitues dhe përfitues të granteve dhe subvencioneve për masat që kanë aplikuar. Kjo ishte një nga skemat më të mëdha që bujqësia shqiptare ka pasur gjatë 27 viteve të fundit, me një vlerë historike prej 22 milionë euro. Pothuajse, gjysma e tyre, më shumë se 50 % do të shkojë për subvencionet e fermerëve dhe blegtorëve dhe pjesa tjetër në investimet në agropërpunim, magazinim, linja prodhimit etj. Këtë vit masat prekën shumë sektorë të bujqësisë, blegtorisë, agropërpunimit, ku për herë të parë u përfshinë dhe sektorë, të cilët nuk kishin përfituar më parë, siç ishte agroturizmi apo masa për produktet tipike etj. Numri i aplikantëve u rrit me 30 % më shumë sesa një vit më parë. Ministri Peleshi ka bërë edhe njëherë thirrje për rritje të besimit në skemat dhe politikat që po ndërmerren, në mënyrë që bujqësia shqiptare të vijojë rrugën e modernizimit. Shumë shpejt do të hapet “thirrja e parë” për Programin IPARD, që do të thotë një mundësi e artë për të gjithë fermerët, agropërpunuesit, blegtorët etj.